ମୁମ୍ବାଇ: ଇଦ୍ର ସ୍ୱତନ୍ତ୍ର ଅବସରରେ ସଲମାନ୍ ଖାନ୍ଙ୍କ ପ୍ରଶଂସକମାନେ ସୁପରଷ୍ଟାରଙ୍କ ଝଲକ ଦେଖିବା ପାଇଁ ତାଙ୍କ ଗାଲାକ୍ସି ବାସଭବନ ବାହାରେ ଆଜି ବହୁ ସଂଖ୍ୟାରେ ଏକାଠି ହୋଇଥିଲେ। ଦୁର୍ଭାଗ୍ୟବଶତଃ ଭିଡ଼ ଏତେ ଅସମ୍ଭାଳ ହୋଇପଡ଼ିଥିଲା ଯେ ଏହାକୁ ନିୟନ୍ତ୍ରଣ କରିବା ପାଇଁ ପୁଲିସକୁ ଲାଠିଚାର୍ଜ କରିବାକୁ ପଡ଼ିଥିଲା।
ଇଦ୍ର ଶୁଭେଚ୍ଛା ଜଣାଇବା ପାଇଁ ବିଭିନ୍ନ ସହରରୁ ଆସିଥିବା ସଲମାନ୍ଙ୍କ ପ୍ରଶଂସକମାନେ ତାଙ୍କ ମୁମ୍ବାଇ ବାସଭବନ ବାହାରେ ଧାଡ଼ି ବାନ୍ଧିଥିଲେ।
ତାଙ୍କୁ ଦେଖିବା ପାଇଁ କିଛି ସମୟ ଅପେକ୍ଷା କରିଥିବା ଫ୍ୟାନ୍ମାନଙ୍କୁ ନିୟନ୍ତ୍ରଣ କରିବା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ହୋଇଥିଲା। ଏହା ସତ୍ତ୍ୱେ ଭିଡ଼ ନିୟନ୍ତ୍ରଣ ପାଇଁ ପୁଲିସ୍କୁ ଲାଠିଚାର୍ଜ କରିବାକୁ ପଡ଼ିଥିଲା।
ସଲମାନ ଖାନ ନିଜ ପ୍ରଶଂସକଙ୍କ ପାଇଁ ଇଦ୍କୁ ସ୍ପେଶାଲ କରିବାର କୌଣସି ସୁଯୋଗ ହାତଛଡ଼ା କରନ୍ତି ନାହିଁ। ଆଜି ସଲମାନ ତାଙ୍କ ନୂଆ ଫିଲ୍ମ ’ସିକନ୍ଦର’ର ଘୋଷଣା କରିଛନ୍ତି, ଯାହାର ନିର୍ଦ୍ଦେଶନା ଦେଇଛନ୍ତି ଏଆର ମୁରୁଗାଦୋସ।
ଇନଷ୍ଟାଗ୍ରାମରେ ଫିଲ୍ମର ଟାଇଟଲ ପ୍ରକାଶ କରି ସଲମାନ ଲେଖିଛନ୍ତି, ‘ଇସ୍ ଇଦ୍’ ବଡେ ମିଆଁ ଛୋଟେ ମିଆଁ’ ଏବଂ ’ମୈଦାନ’ କୋ ଦେଖୋ ଓ ଅଗଲି ଇଦ୍ ସିକନ୍ଦର ସେ ଆ କର ମିଲୋ (ଏହି ଇଦ୍ରେ ଦେଖନ୍ତୁ ବଡ଼େ ମିଆଁ ଛୋଟେ ମିଆଁ ଏବଂ ମୈଦାନ ଦେଖନ୍ତୁ, ଆସନ୍ତା ଇଦ୍, ସିକନ୍ଦରଙ୍କୁ ଭେଟିବା)। ଆପଣମାନଙ୍କୁ ସମସ୍ତଙ୍କୁ ଇଦ୍ ମୁବାରକ! ଶୁଭେଚ୍ଛା!
ଏହି ଅପଡେଟ୍ ସହ ସଲମାନ ପୁଣି ଥରେ ପ୍ରଶଂସକଙ୍କୁ ଶ୍ରେଷ୍ଠ ଇଦ୍ ଉପହାର ଦେଇଛନ୍ତି। ସାଜିଦ ନାଡିଆଡୱାଲାଙ୍କ ପ୍ରଯୋଜିତ ଏବଂ ମୁରୁଗାଦୋସଙ୍କ ନିର୍ଦ୍ଦେଶିତ ଏହି ସିନେମା ୨୦୨୫ ଇଦରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ଏଆର ମୁରୁଗାଦୋସ ‘ଗଜନୀ’ ଜରିଆରେ ହିନ୍ଦୀରେ ଡେବ୍ୟୁ କରିଥିଲେ, ଯାହା ବକ୍ସ ଅଫିସରେ ୧୦୦ କୋଟି ଟଙ୍କା ଅତିକ୍ରମ କରିଥିଲା। ସେ ଅକ୍ଷୟ କୁମାରଙ୍କ ଫିଲ୍ମ ’ହଲିଡେ: ଆ ସୋଲଜର୍ ଇଜ୍ ନେଭର୍ ଅଫ୍ ଡ୍ୟୁଟି’ର ନିର୍ଦ୍ଦେଶନା ଦେଇଥିଲେ।
ବର୍ଷ ବର୍ଷ ଧରି ସଲମାନ ଇଦ୍ରେ ଫିଲ୍ମ ନେଇ ଆସୁଛନ୍ତି। ଇଦ୍ରେ ମୁକ୍ତିଲାଭ କରିଥିବା ଏହି ଅଭିନେତାଙ୍କ ପ୍ରଥମ ଚଳଚ୍ଚିତ୍ର ଥିଲା ୧୯୯୭ରେ ଜୁଡୱା। ଏବଂ ସେବେଠାରୁ ସେ ତାଙ୍କ ଚଳଚ୍ଚିତ୍ର ମାଧ୍ୟମରେ ଇଦ୍ରେ ତାଙ୍କ ପ୍ରଶଂସକମାନଙ୍କୁ ମନୋରଞ୍ଜନ କରିବାକୁ ସୁନିଶ୍ଚିତ କରିଆସୁଛନ୍ତି। ତାଙ୍କର ଦବଙ୍ଗ, ବଡିଗାର୍ଡ, ଏକ ଥା ଟାଇଗର, ବଜରଙ୍ଗୀ ଭାଇଜାନ, ସୁଲତାନ, ଭାରତ ଏବଂ କିସି କା ଭାଇ କିସି କି ଜାନ ଭଳି ସିନେମା ଇଦ୍ ଅବସରରେ ମୁକ୍ତିଲାଭ କରିଥିଲା।
ଚଳିତ ବର୍ଷ ସେ ଏହି ଢାଞ୍ଚାକୁ ଭାଙ୍ଗିଥିଲେ ମଧ୍ୟ ଫିଲ୍ମ ଘୋଷଣା ସହିତ ତାଙ୍କ ପ୍ରଶଂସକଙ୍କ ପାଇଁ ଇଦ୍କୁ ସ୍ପେଶାଲ କରିବା ନିଶ୍ଚିତ କରିଛନ୍ତି।